Cumu empuja la huerça d´un puebrinu,
cumu empuja la genti de Pescueça,
unius dendi los pies a la cabeça
pa luchal pola fe de su destinu.
Se mienta esti poel Festivalinu,
mentandu d´esti puebru su grandeça,
que espavila de golpi la pereça
pa tenel estu siempri de continu.
pa´tilval del huturu las vereas,
vieni el Festivalinu del presenti
i enel vamus tos juntus de carea.
Ai que echal en la tierra la simienti
pa que la sementera pruntu sea
un puebru que consigui lo que sienti.
domingo, 15 de enero de 2012
lunes, 2 de enero de 2012
LA INTERNÉ
Ara qu´andamus liaus
con estu de la interné,
estamus tos mu enteraus
del cumu, el cuandu i polque.
Los pedioricus del mundu
ya toitus los pueis leel,
los partis i los endilguis
de la cencia i del sabel,
cualquiel cosina que busquis
enel gugli, la pueis vel,
na mas tienis que escrevil
lo que te cumpla ponel
i alli de golpi te sali
lo que aigas escritu enel.
Estu es algu mu aparenti
i tenelu es menestel
pa vel si a subiu el paru,
los garbanzus u el café
u si el asuntu anda mal
u si anda un poquinu bien,
u si l´a ganau el Balsa
al Ral Madris otra ve.
Es una cosa mu guena
Esti enreu del interné.
Cumu esu que mientan feibu
i que silvi pa ponel
to lo qu´a ti te s´ocurra,
i alli to´l mundu lo ve,
peniculas y retratus,
lo que t´a pasau antiel
u lu qu´aluegu te pasi
mañana a l´amanecel.
Alli tienis de continu
amigus a tutiplén,
i pueis palral escreviendu
con to el que quieras tenel,
si te cumpli a ti tenelas,
palrrandas ca dos por tres.
Es algu mu entreteniu
i de muchu conocel.
Asina que no seas bobu,
Asina que no seas bobu,
pol que si quieris sabel,
tienis que entral en las redis,
pa que pueas aprendel
to lo que pasa en el mundu,
i te pueas enteral bien,
que oi, pa sel un sabihondu
ai qu´estal en la interné.
Suscribirse a:
Entradas (Atom)