Al renti del riu Alagon,
Junt´a l´Aceña tiu Amanciu,
Esisti un puenti mu entiguu
Que lo hizun hazi añus
Pa poel pasal l´arroyu
Con animalis cargaus,
Llevandu el trigu a l´Aceña,
A la molienda del granu.
Un puenti hechu de pieras
Que hizun hombris d´antañu
Con suoris de las frentis
y la juerza de las manus.
Puenti hechu con orgullu,
Con cariñu levantau
Y mu cudiau pol la genti
D´aquellus tiempus pasaus.
Ara esti puenti se hundi,
Esta tristi, abandonau,
A cachinus se farrunga,
Igual que un sueñu cansau.
Las cosas hechas de antis,
Pol nuestrus antipasaus,
En un tesoru del pueblu
Que la estoria mus ha dau,
Y tenemus que cudia-las
Pa que durin muchus añus
No dejeis que se mus caya
Com´un chozu faratau
El puenti del Cachalón
Que es menumentu al trebaju,
Que es patrimoñu d´un pueblu
Y deviamus que cudia-lu.
Que es coltura populal,
Que es un recuerdu d´antañu
Pol ondi diva la genti
Con animalis cargaus
Pa la molienda del trigu
A l´Aceña de tiu amanciu.
