Los campus estan sin floris
que alegrin la primavera
esta resecu el terrenu,
se cueci la sementera,
no creci ni pa na el trigu,
güeli el airi a tierra seca,
i en las plaeras i plaus
ni una mijina de yelva.
Yo no se que va a pasal
si el cielu no remienda.
Esta transiu el ganau,
sin poel lambel siquiea
ni un cachininu de verdi
que le refresqui la lengua,
i los probis ganaerus
venga a gastalsi las perras
con piensus i con alpacas
pa vacas, cabras i ovejas,
i asina tiral pa lanti
con el ganau en la hesa.
Yo no se que va a pasal
cumu plontu no mus llueva,
que ni el campu tiene floris
qu´alegrin la primavera.
Asin qu´amus asperal,
a vel si ya plontu llegan
las novenas de San Marcus,
las que cantan en Pescueça,
a vel si el Santu Benditu
poni la oreja bien cerca
i atilva bien los cantaris
que cantan en las novenas,
a vel si acasu pii al cielu
pa que ya plontu mus llueva,
que se enllenin bien los charcus
i s´amollezca la tierra
s´acabi esti sequeaeru
i creza grandi la yelva,
pa que coman los ganaus
i reverdeza la hesa
i florezan to los campus
i alegrin la primavera.
