Que lo sepa el mundu enteru,
que toa la genti lo sepa,
qu´ai un tesoru escondiu
en el hondón de mi tierra.
El hondón de los sentiris
de nuestra raza estremeña.
Un tesoru adormilau
al sombraju de la siesta,
en los terronis del surcu,
ondi se escondi la siembra
pa que se cueça de queu
la hiel de la sementera.
Un tesoru amontonau
pol suoris i querencias
pol fatigas i trebajus,
pol trajinis i tareas,
que van granandu los trigus
sin ninguna recompensa.
De tanta tierra sembrá,
solu la tierra mos quea.
Deja-lu abiertu el postigu,
las ventanas i las puertas,
pa que el tesoru escondiu
de nuestra raza estremeñase levanti entri canchalis,
entri cerrus i entri sierras,
entri jarales i arroyus
entri encinaris i hesas
i com´un gritu aventau
vueli cumu una bandera.
Que ya esta bien de callalsi
tubiendu la calga a cuesta.
Aventemus el tesoru
dormiu en nuestra concencia,
que es esi ergullu callau,
frutu d´antiguas cosechas.Esi tesoru escondiu
en el hondón de mi tierra.
