RETRATUS D´ANTAÑU

Andu viendu retratus del antañu,
farrungaus i ya viejus polel tiempu,
i cumun gabarruñu de sentiris
se m´avienin di golpi los ricuerdus,.
i me enllenan la sangri d´emocionis
i de santus de altonci el pensamientu.
Retratus d´antiayel junt´a mi madri,
cuandu yo era chiquinu cum´un cepu,
i andaba con tirantis y calzonas
rebrincandu las callis de contentu;
calzonas remendás en la culera,
que asin, ca dos por tres, pa que te cuentu,
refalandu u saltandu en los canchalis
saliamus con un sieti en el traseru,
y al instanti, dispues de una mandanga,
mi madri le plantaba un guen remiendu.
Retratus de las heras i del trillu
pa lli pa la praera de tiu pedru,
o en las nochis calientis de veranu
en las palvas dulmiendu cara´l cielu.
Retratus de mi padri polas callis
agilandu mu listu i mu derechu,
llevandu d´aguacil el uniformi,
a hechal los pregonis polel puebru.
Retratus con mi madri en el burrinu
saliendu en las mañanas mu ligeru,
aparejau d´albarda i aguaeras
enllená toa de trastis y trasterus,
a lavalnus la múa enel arroyu
que llaman Arrojamu d´azi tiempu.
Retratus de chiquinus ena praza,
jugandu a la peona o al pañuelu
a los enconderichis, a cordonis,
a espidula, al pillal o al retorteru.
Retratus de mi puebru, de mi genti,
de los seris querius que se huerun,
retratus del colol de la raizis
que crezin en los surcus del barbechu.
retratus de la casa de mis padris,
retratus del sentil de mis aguelus,
retratus olviaus en los cajonis
que me enllenan la sangri de ricuerdus.

<iframe width="420" height="315" src="http://www.youtube.com/embed/3oB5orVP0aI" frameborder="0" allowfullscreen></iframe>

EL LIU DE LAS PARCELAS (Dedicado a la primer concentracion parcelaria de Pescueza, año 1987)

.-Oyi, ondi vas tan corriendu
con esti friu que pela,
que no ves cuasi a la genti
de tanta priesa que llevas.

.-Hombri, ¿Que pasa, compadri?
dispensa que no te viera,
si tu, al pasal, no me hablas,
ni me doi cuenta siquíea´.
Es qu´anda unu precupau
con estu e las parcelas,
que de tantu rebullil
te da dolol de caeza.
Ai, en casa, en el braseru
e dejau a la parienta
i voi pa la yuntamientu
a vel estu de la tierras,
qu´echarun anochi el bandu
que nel salon se presentan
los planus y los papelis
pa que lus vea tol que quiera;
y dicin que ya train toas
las reparticiones hechas
y que ca un trai pintau
en los mapas las parcelas.

.-Pos ya ves tu, bien templanu,
p´alla pa la sieti i media,
agile yo de la cama
¡con un dolol de caeza...!
Toa la nochi sin dolmil,
na mas que venga a dal gueltas,
que m´entraban unas ganas
que ya prontu amaneciera
pa dil a vel el primeru
esti asuntu de las tierras.
Me jui pa la yuntamientu
cuasi qu´a las ochu y media,
creyendu que era el primeru,
pa cuandu abrieran la puerta;
pos a la puerta aguardandu
abia, lo menus, cuarenta.
I haci un ratu e saliu
con un liu en la caeza,
que no ai cristu que s´enteri
de esti asuntu de las tierras.
Yo tengu, cumu tu sabis,
sin mental el cachu guerta,
entri propias y baldius,
sieti janegas e tierra,
pos resulta qu´en los mapas
m´a tocau ectaria y media,
que si el asuntu no marra
bienin a sel tres janegas:
u sea, que con esti liu
del coñu de la parcelas
el casu es que m´an queau
con la meta de la tierra.

.-Peru esu es pol el canteu
que endilgan a las parcelas.
Si tu las tienis de cuarta
y te las dan de primera,
en esi casu tenemus
que te toca menus tierra,
i tamién ties que pensal,
pa que te salga la cuenta
que, entri el valol de los pastus,
las laboris y la yerba
pierdin los tierras propias
y los del baldiu aumentan.

.-Pus vaya gracia qu´an hechu
con el valol de la tierras,
que si las tienis de cuarta
y te las dan de primera,
de cuatru partis que tienis
te quéan en una y media.

.-Guenu, tapocu es pa tantu.
Si pierdis algu e la tierra
pol el valol de los pastus
y el canteu e las parcelas,
debis de pensal qu´aluegu
tu eris el amu de ellas,
pa hazel y desazel,
pa labral cuandu tu quieras
y pa metel un ganau
que t´aprobechi la yerba.

.-Si esu estamus compadri,
si algu de ventaja lleva,
i an que me ves que regruñu
tamién veu cosas mu guenas.

.-Pus claru que si compadri,
qu´el asuntu las parcelas
en muchus pueblus s´a hechu
y a dau guenas esperencias,
y an qu´algunus no lo´n tiendin
y aigan otrus que protestan,
ya veras tu cumu al cabu
anda la genti contenta.
Guenu ast´aluegu compadri
voi a vel la mi parcela,
qu´es la media pa la una
y antis que cierrin la puerta
quieru vel si desenrreu
esti asuntu de las tierras
y se m´acabi de golpi
esti dolol de caeza.

COSINAS DE ANTIS

El tiu Aquilinu "El Sastri", cumu mienta el su moti, era el sastri del pueblu, peru tamien era un hombri mu enterau a tentu del sabel y tamién mu leiu y algu filosufu. A mi amigu y vecinu, de cuandu yo era muchachu, Pacu "El Nin" i a mi, mos gustaba muchu dil con el de paseu al Barreritu i mus esplicaba cosinas de cencias que el tamien abia leiu de cuandu era chiquinu en la´scuela. Cumu sastri, dicia la genti qu´era mu guen sastri i que hacia guenus trajis y guenus calzonis y pantalonis de pana, i mu bien hechus.
M´ancuerdu tamién de la mi calli, ondi yo naci, hecha toa de piedras. I tamién m´ancuerdu de los mis vecinus, qu´era genti muy guena y mu socorría.
La calli, pol aquel entoncis, era la calli Caganchas i aluegu dispues, la pusierun la calli El Liriu. Los mis vecinus eran, tiu Pedru "Angora", Tia Maria, Tia Carlota, Tia Paula, Tiu Marianu, Tia Antonia "Canchala", la madri de mi amigu Santiagu "El Canchal", i un poquinu mas parriba de la calli, palli pal arroyu e "La Rospila", vivian Tia Daniela (que la poias vel muchas vecis, meandu de pie en meta la calli, mentris que se comia un cachu pan con azetunas) y tia Ulalia "la de las cabras", (que cuasi siempri diba escalza pol la calli). Eran toas mujeris mu dispuestas y mu trabajaoras. Pol las tardis, cuando hacia guen tiempu, las mujeris mas viejas se enreaban a jugal a la loteria (esu qu´ara llaman bingu) en la calzá e tia Paula; i los hombris se iban a chal la partia an ca tiu Grabiel o an ca tiu Felis "El molineru" (que siempri iba vestiu con chambra y sombreru de pañu; y tenia mu mala lechi)
Mentris tantu, mi amigu Santiagu "El Canchal" i yo, dispues que saliamus de la´scuela, mus ibámus pal Matorral a chali a los burrus i a taponal las gallinas, i palli pasabámus la tardi entretenius con esus enreus

LA JUERZA DEL EMPEÑU (Sonetu a los antiguus labraoris estremeñus)

M´ancuerdu d´aquel puebru chiquininu
ondi a mi m´endilgarun la nacencia,
ondi tubun los probis la esperencia
de callal entri surcus de continu.

M´ancuerdu de los viejus ya cansinus,

mancornaus en los poyus de la cencia,

desliandu el sentil de la concencia

de aquel jondu vivil de sus destinus.

Hombris nuestrus, antiguus labraoris,

que simbrarun la tierra y la regarun

con la juerza del sol de sus suoris.

Estremeñus que siempri se callarun,

supiendu qu´en la boca e los señoris
se farataba el pan qu´ellus sembrarun.

NUEVA RETAHILA E PARABRAS E PESCUEÇA Y DE LOS SUS ALREORIS. Por Luis Mateos Ramos

Aguila o linci.-Frase dirigida a una persona lista e inteligente que aprovecha la ocasión en negocios de compra o venta oportunamente. F. "Esi es un aguila, "Esi es un linci" "Na mas anda que a las hechás"

Abuja.-Herramienta pequeña punzante de acero fino que usan las mujeres para coser. Persona que habla mas de lo que tiene que hablar. F "Callati que te vas de la abuja"

Adiviñón.-Prenda o utensilio que ya no se usa por ser antiguo. F. "Andi vas con esi adiviñón"

Almorzal.-Desayunar.

Bobaina.-Persona medio boba, que hace cosas raras. F. "Esi muchachu es un bobaina"

Barruntu.-Escuchar un ruido o golpe. F. "Pai se barrunta algu raru"

Biloriu.-Persona que anda tontamente, dando vueltas, sin saber donde va. F. "Es cumu un biloriu"

Cabachuela.-Azada de acero gruesa que se usa para quitar malezas en el campo, mayormente, tomillos, jaras, etc

Cachimbá.-Coger con demasía frutos, como bellotas, aceitunas u otros frutos. F. "Vaya una cachimbá de bellotas qu´apañau esi"

Esconfiau.-Dícese de la persona que no se fia de lo que le dicen. F. "Esi es mas esconfiau qu´una jaca tuerta"

Escaldau.-Bañar con agua cociendo a un animal o cosa. Personas que aunque vean claro un negocio no lo aceptan, por engaño que hayan tenido otras veces. F. "El gatu escaldau del agua fria júi"

Escoñá.-Daño que se le hace a una caballeria cuando se carga mucho con leña u otra cosa. F."No l´hechis mas calga qu´escoñas la burranca"

Entumíu.-Molestia que se siente en las piernas a especie de calambres al estar mucho tiempo sin moverlas.
F. "Sali de alli entumíu"

Hendiu.-Trozo de tierra de forma rectangular, de madera larga o tubo que se divide en dos partes iguales linealmente. F. "Aquellu va hendiu". o " aquellu lo han hendiu"

Leñu.-Trozo grueso de madera de encina u otro arbol.

Machurru.-Colina pequeña, llena de canchales, matas, jaras y otras malezas que no se puede aprovechar. Inservible.

Migaja.-Trozo de tocino del cerdo frito que normalmente comen los campesinos o trabajadores del campo por la mañana, después de desayunar unas sopas.

Orejera.-Especie de palo que se clava en el dental del arado romano para que eche la tierra a ambas partes iguales cuando se ara la tierra. Persona que tiene las orejas muy grandes y muy abiertas. F. "Tieni unas orejas que paicin unas orejeras"

Ovanillu.-Tumor a bulto que le sale a los animales en ciertas partes del cuerpo.

Rabailla.-Parte inferior de la espalda. F. Me dueli la rabailla" o " Me dueli la burra"

Sagañón.-Persona o animal que come mucho y no esta nunca saciada. F. "Esi comi cum´un sagañón"

Tarma o talma.-Ramo de encina de leña menuda

Viroti.-Monte, cosa u objeto que sobresale del suelo. Colina pequeña en medio de la Vega de la Rivera de Fresnedosa, en el término de Pescueza llamado "El Cerru Viroti" Suele decirse "Encima el Cerru Viroti ai un tiu en peloti, si voi palla le tiru con el garroti"

Zarpazu.-Herida echa por un animal dañino a otro domestico, como el lobo a la obeja o a la cabra. F. " Le harreo un zarpazu"

================================================

FRASES DIRIGIDAS A UNA PERSONA QUE ES TORPE,BRUTA E IGNORANTE Y QUE MUCHAS VECES NO CUMPLE CON LO DEBIDO:

"Estas mas loca qu´una cabra"
"Ni sabi si pega en crabu o en herraura"
"Lo mesmu dizi ochu qu´ochenta"
"Lo mesmu dizi achi que be"
"Tieni menus asientu qu´un guebu"
"Es un tontu pelau"
"Es cum´un mochuelu"
"Es un alcornoqui"
"Lo mesmu las tiras patas arriba que patas abaju"

Esta endilgau tal y cumu lo a escritu Luis Mateus. No es estrañu que angunas prabrinas o frasis resultin algu raras peru asina l a escritu Luis y cumu siempri s´a sentiu y s´a veniu dihendu paqui.

EL ASUNTU LAS BELLOTAS

Pai pa la hesa boyal
de esti puebru e Pescueça
se ajuntan dos ganaerus
que son de cabras y obejas.
D. Jose Llanus i Ramus
cabreru de pura cepa
al que le mientan "El Chapa"
Pol trabajal la "materia",
i D. Angil Martín Sanchis
"Angeleti" pa mas señas,
ganaeru arrendatariu
y el amu de las obejas
que con las cabras del Chapa
espabilan toa la hesa.
En estu vienin dihendu
que pol el puebru se mienta
que Grabiel Sierra Gonzalis,
"El Niñu de la capea",
ha comprau toa las bellotas
pa el su ganau de cerda,
y las obejas y cabras
ocupantis de la hesa
que no entiendin de negocius
ni de compras ni de ventas
dan vocis pol la boyal
entri gritus de protestas
que los cerdus e Grabiel
s´han metiu en la su hesa.
S´ajuntarun en reunión
las cabras i las obejas
pusiendu en ordin del dia
la ocupación e la hesa
y palrau bien el asuntu
dispues de explicau el tema
han sacau unus papelis
que pol to la hesa avientan.
Estu papelinus dizin
con parabras de protestas
"Que atilvá la ecupacion
de estus cochinus e mierda,
diran las cabras d´un lau
y del otru las obejas
pa no dejallu tranquilus
hasta que dejin la hesa
que no ai pol que ni pol cuandu
a meltelsi en las sus tierras
y a comelsi la bellotas
sin queal ni una siquiera.

SAN MARCUS, EL PATRONU DE PESCUEÇA

San Marcus es un festeju
mu relevanti en Pescueça;
son las fiestas patronalis
qu´enesti puebru festejan.
El venticincu d´abril
es mesmamenti la fecha
Dendi tiempus de los quirius
s´estan hidiendu esta fiestas,
que veiti a sabel de cuandu
vieni el arranqui de ella.
A lo primeru, el dia antis,
tocan a vuelu, mu recias,
pa vispera de San Marcus,
las campanas de la Igresia.
Dispués, al siguienti día,
s´avientan con mucha juerza
los cohetis, mu templanu,
qu´el mayordomu harrea
pa dispertal a to´l puebru
y hechal la genti juera,
que pa esu es el día e San Marcus
y es el Patrón de Pescueça.
Dispués, a esu de las doci,
hay una misa estremeña
con música de folcrori
y cantaris de la tierra;
y endispués la prucesión
pol las callis y prazuelas,
las loas y las mandas
que dendi un balcón se hechan
y el mayoldomu las palra
con vos mu juerti y mu recia
pa que to el puebru se entiri
y toa la genti lo vea
agraeciendu a San Marcus
el favol que le piéra.
Tamién cantan la mujeris,
agachás tras d´una puerta,
unus cantaris antiguus
de mu solenni rareza
que llaman "Los pajarinus"
y tienin mucha caencia.
Dispués, to el puebru a la Plaza,
a la "hechá de banderas".
Toa la genti haci un corru
y alli en el mediu se hechan
las banderas e San Marcus
aventandu la su tela
y pidiénduli salú

pol la genti que esta juera,

pol los nuestrus familiaris

y pol las nuestras querencias.

Dispués d´esta ceremonia

toitu el puebru de Pescueza

vamus an ca´l mayordomu

a l´acabiju e la fiesta,

pa celebral el conviti

con coquillus y floretas.

RETAHILA E PARABRAS EN ESTREMEÑU DE PESCUEÇA Y DE LOS SUS ALREORIS.

Retahíla e parabras que se icin pol los puebrus e Pescueça, Portaji, Cachorrilla, Casillas e Coria y otrus puebrinus de la comarca del Alagón , hecha entri Luis Mateus Ramus  y Crus Dias Marcu,  No están enjilá en ordin alfabeticu, se an iu enjaretandu sigún se nus an iu ocurriendu.

Acabiju.-Terminau concluiu, acabau

Desapartau.- Apartau, separau

Rescalientu. Desazon, disgustu

Abrasaeru: Muchu disgustu

Juelliga, Uella

Pista: Uella

Acibuchi. Olivu silvestri

Mancornau: Deprimiu, apesaumbrau

Trasogueru: Leñu gordu que se poni en las lumbris

Arrimaeru: Lo mesmu

Caldera, Cubu

Pósino: Esatu, es la verda, esu es lo que es. afirmativu

Jeitu: jorma de hadel alguna cosa, jorma de sel. Manera de hadel algu.

A que ton; Negativu, que asin no es el casu

Sostribau. Apoyau en algu, f. esi esta sostribau en el troncu la encina

Pitera. Hería hecha en la caeza con una piera

Chivoleta: Vulva, vagina, parti ginital estiriol de la mujel

Trastazu. Dal un golpi con algu

Empelijincalsi: Protestal con ira y coraji, f. Esi sa empelijincau

Amancornau. Dolol de caeza, enfermeá, pesaumbri.

Cagalera: Amistá en demasía, f. vaya cagalera que tienin esus dos.

Jarineandu: Cundu lluevi mu pocu y mu dispacinu

Patulea:  Tumultu de presonas u de animalis.

Respajilón: Vel algu en mu poquinu tiempu, f: la e vistu, cuantis cuantis, de respajilón.

Entenganá: Presona que tieni muchu friu, f. esa esta entenganá

Aduleju. Prenda de vestil mu antigua que ya no se usa, f:. Andi vas con esi aduleju.

Engarañau: Que tieni las manus y los deus mu congelaus pol el friu y no puei hadel na.

Tunda: Zurra o paliza, f: vaya una tunda que la sacuiu al muchachu

Ingarniu: Presona debil, torpi de mu poquinu alcanci

Soberana: Una elá mu grande, f. que guena soberana tenemus oy

Transiu: Presona que tieni mucha hambri: f. estoy transiu u estoy transia

Pingochu o mingochu: Cuandu alguin quieri hadel algu y siempri lo hadi mal, f. estati quietu, qu´eris un mingochu

Escopeteal: Mulmural de los demas, chismorreal, f. na mas que va pa escopeteal.

Sacu. Vestiu antiguu que le ponian a las mozas; f. ponli el sacu a la muchacha.

Escuilla: Cazuela chiquina y fragil de barru

Balsal. Bailal, danzal al son de la  gaita y el tamboril o l´alcordion

Parramera: Cuandu estan la billotas u acitunas mu estendia en la tierra

Quirius: Mu antiguu, f. alla pol los añus quirius

Antaño: El añu pasau.

Oguañu. Esti añu, el que esta en cursu

Tanganillazu. Golpi dau huerti con un palu

Mollegueal: Cojeal algu, mu pocu

Ojeau: Que tieni pesaumbri, simpleza y mal estau, sin sabel qu´es lo que tieni.

Atrochal: Dil andandu a derechu, entri maleza, sin caminu ni verea, pa adelantal, f. sali a trochis mochis.

Aculcal: Salil an cata alguin pol dondi se sabi que va a pasal

Empeloti, Desnuu totalmenti.

Berriondu: Retoñu u vara flesibli d´una encina

Bilortu: Rama d´un arbul que creci parriba, a lo tontu,  independienti de las demas. Presona que le gusta enteralsi de to, f. Eris un bilortu

Calapachu. Hombri brutu e inoranti, que no entra en razonis.

A espetacuernus: Presona u animal que sali huyendu de golpi sin andal avisando

Jié: Que gueli mu juerti y mu mal:  f. Cucha, ¿no te jié esi corral?

Acullá: Que esta lejus. f. esu esta palla acullá

Reballal. Dispertal a las tres u las cuatru la madrugá, mayolmenti la genti de mas edá. Se sueli dizil, "La genti vieja reballá"

Zaqueilá: Sacu u costal bien llenu de billotas, acitunas etc.

Esparabanis: Que al andal arrastra un poquinu las patas. f. esi burru tieni esparabanis

Despeau, Presona u animal que cojea un poquinu. f. paici qu´anda algu despeau

Amulau o atufau. Enfaau (enfadado)

Descaiu: Presona u animal delgau y endebli, que no tieni juerza. f. no puei con los papelis de un casamientu

Maitinis. Deficultá pa entendel a alguin pol la mala prenunciación de las parabras. f. m`estoy viendu a maitinis pa entendelti.

Manganilla o zurriaga.  Palu largu uniu a otru mas chicu pol una cuerda que sirbi para bareal las encinas y los carrascus.

Dorrión o rebati. Vara que se le añidi a la manganilla enel estremu pa bareal la billotas

Ruchu. Palu qu´antiguamenti sirbia a mou de bastón y que se colgaba del antibrazu derechu con una cuerda, y sirbia pa salil de nochi de ronda. Tamien se llamaba, el rondaol

Zurriagazu o manganillazu, Golpi dau con la zurriaga o manganilla

Marulán. Hombri brutu, torpi i inoranti que jaci cosas raras

Tarambana. Presona incoherenti, que lo que ici hoy no es mañana y que muchas vecis no cumpli lo que trata

Desapartau. Ícise del matrimoniu que se separa.

FRASIS:

Se vio cumu zorra que cria sieti. Presona que se ve apurá pol algun negociu u problema en la vía

Salierun ca unu por pa puta perra: Juntança que se estorría saliendu ca unu pol su lau con distintas opinionis.

Frasis negativas y de despreciu hacia alguna cosa o presona cuandu a mentau algu con lo que no andamus d´acuerdu  

Las tus patas.  

Ahí el tu rabu mojinu.

Ahí el tu culu.

Ay que ya meti la pata en un charcu: Frasi que ici una presona quen´una reunión ici algu que no debi

LAS COSINAS D´ANTAÑU

M´ancuerdu muchas vecis
de cuandu era un muchachu,
corriendu pol las callis,
jarriandumi esquinazus.
M´acuerdu de la trilla
del trigu enel veranu,
de dilmi a pol los mulus
con mi amigu Santiagu
o salil con mi madri
a labal mu templanu
los trastis al arroyu
que llaman Arrojamu
llevandu pa la calga
un burru que pidiamus
con una aguaeras
llenecitas de trapus.
Alli en aquel arroyu
jici yo, cum´un ranu,
los primerus raneus
jasta salil naandu,
que yo aprendi a naal
palli pal Arrojamu.
M´ancuerdu del porqueru
llevandu a los guarrapus
por entri las callejas
con un guen istalachu,
tiborrandu la jesa
con la partia de guarrus;
i aluegu, pa que coman
i se quein bien cebau,
con una manganilla,
bariaba los carrascus,
tirandu las bellotas
a juerza de porrazus.
Siempri tengu un ratinu
pa´enrecordal dispaciu
la genti de mi pueblu,
las cosinas d´antañu.
Costumbris de mi tierra
qu´ara te estoi contandu,
cosinas d´otras vecis,
cuandu yo era un muchachu.

ASIN QUIERU YO PALRAL

Cumu palraban mis padris
y endinantis mis agüelus,
cumu la genti palraba
en los campus y en los pueblus
cumu se ician las cosinas,
los amoris, los requiebrus,
con esi geitu que tienin
los sentiris estremeñus,
asin quieru yo palral,
dicil las cosas que sientu
con esi sentil tan jondu
que tieni esti pueblu nuestru,
asin quieru yo cantali
cosinas dulcis en versus
a esta tierra de mi sangri,
que me enllena si la mientu,
asin quieru yo palral,
con el mesmu sentimientu,
con las mesmas parabrinas,
y con los mesmus acentus:
igual qu´antañu palraban
mis padris y mis agüelus.