LOS MOTIVUS D´EMIGRAL

L´apreguntaba Gelipi,

un mozu de entiligencia,

a unus tres u cuatru viejus,

pai pa lus añus sesenta,

una tardi de San Marcus

en el pueblu de Pescueça:

"¿Que tieni esta tierra mia,

que tieni esta tierra nuestra

pa que se vaiga la genti

ahilandu pa otras tierras?".

I va i dizi tiu Gapitu:

"es que la genti no aspera

a que to estu se enderezi

i otru mejol tiempu guelva.

Ya vendran añus mejoris".

I tiu Pablu le contesta:

"Cumu quedrás que se quein

sin tenel ni pa merienda,

con un cachinu jornal

pa toa la familia entera.

Lus muchachinus chiquinus,

la mujel hecha una negra,

i el aguantandu sopapus
del friu y la solejera,
de lus espantus del amu,
de rezenzius y tormentas,

I to esu ¿pa que, Gapitu?

pal no tenel ni una perra,

que van a cascal de hambri

si esti asuntu no s´enmienda.

Ya no tienin mas remediu

que hacelsi las maletas,

a vel si ancuentran trebaju

que l´avientin la miseria

i puean tiral pa lanti

pa salil de la probeza.

Bien de mal que se le hazi

tenel que dejal su tierra,

ondi nacierun sus padris,

ondi hue la su nacencia,

ondi jugó de muchachu,

i de chiquinu en la escuela

ondi tuvu cuandu mozu

la sus primeras querenzias.

Bien de mal que se le hazi

tenel que dejal su tierra

Peru esti probi emigranti

siempri llevará pol cuenta

que nazió en Estremaura,

que tieni sangri estremeña

y pol muchu que andi alejus

nunca s´olviará de ella.