Mairi, me deji que palri
un poquininu estremeñu,
que es el paral de mi jenti
i que lo llevu aquí drentu.
Mairi, me deji que canti
estas cosinas que sientu,
con los deciris d´antañu,
cuasi perdius enel tiempu.
Mairi, me deji que diga
estas querencias que tengu,
arrebujás en sentiris,
aquina, drentu del pechu.
Mairi, me deji que avienti
los airis del pensamientu
conel paral querenciosu
que siempri a mentau mi puebru.
Mairi dejimi sentalmi
al renti d´esti silenciu
pa llenalu de palabras
con los sentiris que tengu.
Mairi me deji que canti
estas cosinas que sientu,
Mairi, me deji que palri
un poquininu estremeñu.
No hay comentarios:
Publicar un comentario