SOLEDAIS DE LA TARDI

Respajilonis de sueñus,

cumu guantazus de calma,

de las lindis de la tardi,

me vienen a dal compaña.

Airinus del sentimientu

van refrescandu mi cara

mentris que abrazu a la sombra

cuandu la tardi s´amansa.

Vieni una brisina verdi,

fresca cumu una mañana,

a removel la simienti

de sentiris que se callan.

Cumu un rescoldu escondiu

que endinantis huera llama,

me dan vocis de pa drentu

los ecus de mis parabras;

tengu el silenciu gastau

de tantu palra-li al agua

que corri polos regatus

de estus venerus del alma.

I asina voi desliandu

sentimientus i asperanzas,

que, entri la nieblas del sueñu,

se cuezin enas entrañas.

Soledais ondi anciendu
las querencias que m´abrasan,
soledais de la tardi,
soledais que m´abrazan,
soledais que m´ascondin,

soledais que me llaman;

soledais cumu mairis

que me estiendin en sus haldas

soledais de mi tierra:

pechus de un sol que amamanta.

soledais... soledais...

cuandu la tardi se apaga…